VIGAN CITY – Riri iti daga ti mapapati a rason no apay a napaltugan ti maysa a senior citizen idiay Ayusan Sur, Vigan City.
Nabigbig ti biktima a ni Yolanda Reclusado, agtawen iti innem a pulo ket walo nga agnaned idiay Lubong, San Vicente.
Nakalugan ti biktima iti tricycle idi agawid koma iti lugarda kadua ti kaanakanna nga isu ti nagmaneho iti nasao a lugan idin ta adda dagiti nakamotorsiklo a lalaki a nangpaltog kenkuana iti namin dua a daras.
Gapu ti dayta, nadunor ti akin-kannawan nga ima ken kilikili ti biktima a naitaray iti kaasitgan a balay pagagasan.
Segun ti biktima, pinangtaan isuna dagiti kabagyanna iti kallabes gapu iti mapapati a panangagumda kenkuana kadagiti sanikuana.
Naala iti nakapasamakan ti krimen ti maysa a basyo ti mapapati a caliber 45 a paltog isu nga im-imbestigaranen dagiti pannakabagi ti linteg ti napasamak ken sapsapulendan no siasino dagiti nakalibas a suspek tapno sangwenda ti kaso a maipila kadakuada.
