VIGAN CITY – Im-imbestigaran dagiti kameng ti linteg idiay Tayum, Abra no siasino ti suspek a nangpapatay ti maysa a lalaki ken no ania ti motibona.
Nabigbig ti biktima a ni Alejandro Padagas, agtawen ti limapulo ket siam, maysa a mannalon a napaltugan idiay Sitio Wayya, Brgy. Velasco iti nasao nga ili.
Adda iti ruar ti pagtaengan ti biktima nga agtugtugaw ta banbantayanna ti pagaramidan ti ugingda idin ta bigla nga inasikgan ti saan pay a nabigbig a suspek a nangpaltog kenkuana iti namin-adu a daras iti nadumaduma a paset ti bagina a puon ti nakatayanna.
Naala iti nakapasamakan ti krimen ti innem a basyo ti bala ti 12-gauge shotgun ken no pay kasta, sapsapulendan ti nakalibas a suspek tapno sangwenna ti kaso a maipila kontra kenkuana.
Malaksid iti dayta, daytan ti maikatlo nga insidente ti pammaltog a napasamak agsipud idi naipatungpal ti enhanced community quarantine.
