VIGAN CITY – Inkari ni Police. Lt. Col. Fidel Junio, hepe ti Vigan City police station nga imbestigaran da a naimbag iti napasamak a pammaltog idiay Rizal St,. Barangay 3, Vigan City idi rabii ti September 23 a nakatayan ti biktima a ni Acmad Olay nga agtawen ti dua pulo ket walo a taga- Zone 3, Bantay.
Segun ken ni Junio, manarimaan pay laeng iti panangala da iti naan-anay nga impormasyon inaig ti biktima uray nu adu ti maaw-awat da nga impormasyon a ti biktima ket konektado iti iligal a droga ken nakemmeg pay gapu ti iligal a droga idiay Cabugao nga isu iti nakaibaludan na.
Kabayatanna, kinumpirmaran met ni Imam Kamal Ampa a lider ti Muslim community idiay Zone 3, Bantay a naibalud ti biktima idi gapu iti iligal a droga ngem nawaya-wayaan met laeng.
Para ken ni Imam, nu mapaneknekan a gapu iti iligal a droga iti rason nu apay a napaltugan ti biktima, awan iti maaramidan da ngem nu adda iti sabali a motibo a rumuwar inaig iti napasamak kenkuana, kalikagum da a maipaayan iti hustisya ti biktima agsipud ta saan met a nainkalintegan iti pumatay ti maysa a tao.
