Pinasingkedan ni PLTCOL. Daniel Pel-ey, Public Information Officer iti Abra Police Provincial Office a mapapati nga aksidente ti pannakapaltog ti maysa a babai idiay Sitio Tapayen, Barangay Alaoa, Tineg, Abra.
Nabigbig ti natay a biktima a ni Roseda Molina Allen, agtawen iti tallopulo ket siam idinto a ti suspek ket ni Jackson Belisario Tayum, agtawen iti tallopulo ket uppat, agpada nga agnaed iti nasao a lugar.
Iti pannaki-uman ti Bombo Radyo Vigan ken ni Pel-ey, daldalusan ti suspek ti 12 gauge shotgun idin ta nakalbitna ket pimmutok a nakatiroan ti biktima a rimuar iti pagtaenganda iti dayta a gundaway.
Intaray dagiti kabagyanna ti biktima iti Rural Health Unit ti Tineg ngem gapu iti kaawan ti doktor ket naipan iti RHU-San Juan ngem naideklarar a dead on arrival.
Nagsagaba iti tama ti paltog ti tengnga ti barukong ti biktima a puon ti nakatayanna.
Naiwayat ti manhunt operation ket nakemmeg ti suspek iti pagtaenganda ken sangwenna ti maipila a kaso.
