VIGAN CITY – Agtultuloy ti panagimbestigar ti Dolores Municipal Police Station no ania ti posible a motibo ti pannakapaltog dagiti agama idiay Barangay Lublubba, Dolores, Abra.
Nabigbig ti ama a biktima a ni Arnel Eduarte Zapata, agtawen iti uppat a pulo ket uppat, drayber ti Dolores ken ti putotna a babai nga agtawen iti uppat a ni Ailish Precious.
Iti pannaki-uman ti Bombo Radyo Vigan ken ni Police Major Harold Alagao, kitkitaenda no posible nga adda pakainaigan dagiti napalabas a rekord ti ama a biktima iti panangpapatayda kenkuana ta daytoy ket datin nga adda kasona a homicide, frustrated homicide ken panaglabsing iti Republic Act 9262 wenno Violence Against Women and their Children Act.
Mapapati nga M16 rifle ti nausar a pinangpaltogda kadagiti agama basar kadagiti narekobre nga empty shell iti nakapasamakan ti krimen.
Maipalagip nga idi Abril 24, agil-ilad dagiti agama iti folding bed iti sangwanan ti pagtaenganda idin ta adda nagsardeng a nakalugan iti motorsiklo iti batogda nga isu ti nangpaltog kadakuada.
Nagsagaba iti tama ti paltog ti nadumaduma a paset ti bagi ti ama a biktima kangrunaan iti takyag, saka ken ubetna idinto a ti putotna ket nagsagaba met iti tama ti paltog ti ubetna a limsut iti tyanna.
