VIGAN CITY – Saan a panagkinnaawatan gapu ti pannaka-bartek iti rason nu apay a binagkong ni Gil Aquino nga agtawen ti tallo pulo ket tallo ni Gerald Aquino nga agtawen ti tallo pulo idiay San Pedro, Narvacan.
Agin-inom dagiti dua iti pagtaengan ni Froilan Adonna idi adda iti saan da a nagkinaawatan ket nagdinnanug da ngem naanawa ida ni Jomer Adonna kenni Lawrence Soria.
Ngem, inasot ti suspek ti kutsilyo a nakasalikag kenkuana ket inbagkong na ken ti biktima a nakadunuran iti akin-kannigid a siket na.
Naipaagas idiay Ilocos Sur District Hospital- Narvacan ti biktima idinto a ti suspek ket nakemmeg idiay pagtaengan da babaen kadagiti nagresponde a kameng ti Narvacan municipal police station.
Kabayatanna, idiay San Pablo, Narvacan, tinagbat ni Victor Cordero nga agtawen ti uppat a pulo ket pito ni Alfredo Ramos Jr nga agtawen ti lima pulo ket maysa.
Agi-inom ti suspek kadua na ti putot na a ni Victor Jay kenni Tonton Damasco idi dimteng ti biktima kadua na ti putot na a ni Adonis nga immun-unan nga adda iti saan da a nagkinaawatan.
Idi dimteng ti biktima, bigla lattan a tinagbat ti suspek ken dagiti kakadua na a nagiinom ti biktima a nakatamaan ti ulo ken rupa na idinto a ti suspek ket nadunor met iti akin-kannigid a luppo na gapu iti panagginnubal da.
Naitaray dagiti nadunor idiay Ilocos Sur District Hospital – Narvacan para iti pannakataming na ket manarimaan pay laeng iti imbestigasyon dagiti otoridad iti napasamak.
