VIGAN CITY – Dua ti natay iti napasamak a pammagsol ken pammaltog idiay Brgy. Bandril, Nagbukel.
Segun ti Nagbukel Municipal Police Station, ti biktima iti pammagsol ket ni Eduardo Garces Cacpal, agtawen ti limapulo ket dua, OFW, balik-bayan manipod Hawaii USA, nga agnaed idiay Brgy. Bandril, Nagbukel idinto a ti biktima ti pammaltog ket ni Arthur Agbulos Baguang Jr., addan ti husto a tawen, mannalon, naasawaan, TUMANA member nga agnaed idiay Brgy. Pobalcion East, Nagbukel ngem agdama nga agnanaed idiay Brgy.Bandril, Nagbukel.
Sakbay iti insidente ket naginom dagiti biktima iti natayan ti kabsat ni Cacpal iti nasao a barangay idi adda ti saanda a nagkinnaawatan ket binagsol ni Baguang ni Cacpal a gappuanan ti pannakatama ti tiyanna.
Nangpidot iti kayo ni Cacpal nga isu ti inkamatna ken ni Baguang ngem bayat ti panangkamatna iti kalsada ket nagsasaruno nga uni ti paltog iti nanggegan iti lugar a gappuanan ti pannakatama ni Baguang.
Gapu ti sinagaba ni Baguang ket naipan iti Ilocos Sur District Hospital-Narvacan babaen ti PNP personnel ngem naideklarar a dead on arrival babaen ti attending physician-na idinto a ni Cacpal ket nagsagaba ti dunor gapu ti pannakabagsolna ket naipan iti isu met la nga ospital ngem naideklarar met laeng a dead on arrival babaen ti attending physician-na.
Iti agdama, agtultuloy iti imbestigasyon dagiti otoridad inaig iti nasao a pasamak.
