Vigan City – Maysa iti nadunor iti napasamak a pammagkong idiay Barangay Magsaysay ili ti Sinait itattay.
Segun kenni PLt. Joel Idica, hepe iti Sinait Municipal Police Station, adda iti nangipakammo kadakuada inaig iti riri a napasamak iti nasao a lugar isu a nagrespondeda ket naamuanda a binagkong ni Renato Ancheta, agtawen ti lima pulo ket lima nga agnaed iti Brgy. Magsaysay, Sinait ti kaanakanna a ni Gabriel Ancheta, agtawen ti uppat a pulo ket dua nga agnaed iti Brgy. Teppang, Sinait.
Nagsinnungbat dagiti aguliteg iti maipapan iti daga a nagkapatakderan iti maysa a store agingga idi nagawid ni Renato ket sinurot ni Gabriel ket intuloyda iti nagriri agingga dimmanog ni Gabriel a gappuanan iti panangiruar ni Renato iti kutsilyo ket imbagkongna kenkuana.
No pay kasta ket natalgeden iti kasasaad ti bitkima idinto a sanguen ti kaso a frustrated homicide ti suspek.
