VIGAN CITY – Kumbinsido iti pamilya ni Jay-Ar Obaldo nga agtawen iti dua pulo ket lima, baro, lodge boy ti Rosebeth Lodge idiay Paras, Candon City ken tubo ti Baracbac Este, Balaoan, La Union a nagpakamatay ti biktima idi parbangon idi June 18 gapu iti mapapati a panagsina da ken ti nobya na a taga-Tarlac.
Segun ken ni Police Lt. Col Jugith del Prado, hepe ti Candon City police station, naidalan latta iti autopsy ti bangkay ti biktima sakbay nga inyawid ti pamilya ti biktima ti bangkay na idiay La Union.
Saan pay laeng nga ammo dagiti otoridad nu anya iti posible a nagririyan ti biktima ken ti nobya na agingga a nagtinnag iti panagsina da a dua nga isu iti rason nu apay a nagpakamatay ti biktima babaen iti panangpaltog na iti pispis na a ti inusar na ket homemade caliber 22.
Gapu ti dayta, kalikaguman dagiti otoridad a makapatang ti nobya ti biktima tapnu masaludsud da kenkuana nu anya iti nagsinaan da a dua.
