VIGAN CITY – Agsakit ti nakem ni Maria Reynafe Momay – Castillo, ti kakaisuna a putot ni Reynaldo Momay a maysa kadagiti mapapati a biktima iti napasamak a Maguindanao Massacre idi November 23, 2009, gapu iti nagbalin a desisyon ti korte.
Ti ekslusibo a pannaki-uman ti Bombo Radyo Vigan ken ni Castillo, saan pay laeng a nagun-od iti hustisya para ti ama na agsipud ta arigna nalipatan payen iti kaaduan iti napasamak ta maika-lima pulo ket walo kuma a biktima ti ama na ngem lima pulo ket pito laeng iti bigbigen ti korte.
Ingunam-gunam na a saan da a kamaten iti kwarta wennu danyos a maibayad kadakuada ngem kayat da laeng a bigbigen ti korte a maysa ti ama na kadagiti biktima iti nakaam-ames a krimen isu nga imbes a 57 counts of murder iti maipila kontra kadagiti kangrunaan a suspek iti krimen ket 58 counts of murder kuma.
Ni Castillo a maysa a nurse idiay Minnesota, US ket nakasagana nga agawid ditoy pagilian tapnu iyapela iti kaso ti ama na.
Maipalagip nga idi nakali dagiti bangkay dagiti biktima iti nasao a krimen ket awan iti nasarakan dagiti otoridad a bangkay ni Momay, malaksid laeng kadagiti ID, dentures wennu pustiso ken ID na.
Kabayatanna, dagiti kangrunaan a suspek a nasentensyaan ti uppat a pulo a tawen a pannakaibalud a da Datu Zaldy Ampatuan, Datu Anwar Ampatuan ken dagiti dadduma pay ket naiyalis dan idiay New Bilibid Prison.
