VIGAN CITY- Desidido nga agikaso ti pamilya ni Christopher Millare Piano, agtawen iti dua pulo ket dua, naasawaan, maysa a helper a residente ti Barangay Capangpangan, Vigan City a pinaltugan ni Michael Dasalla Dagdag, agtawen iti uppat a pulo, naasawaan, tricycle driver ken residente met laeng iti nasao a lugar idi naminsan a rabii.
Ti pannaki-uman ti Bombo Radyo Vigan ken ti ama ti biktima a ni Ferdinand Piano, kayat da a maikkan iti pagnakeman ti suspek ta nu makainom ket ruwam na ti agprobokar ken agpaputok iti paltog.
Segun ken ni Ferdinand, napintas ti panangtrato da ken ti suspek, nangruna ti biktima ken dagiti dadduma a kakabsat na nu apay a kasjay iti naaramid na.
Ti agdama, naka-ICU ti biktima ta obserbaran pay dagiti doktor iti maysa agingga dua nga aldaw.
Maipalagip a pinaglibakan ti suspek ti inaramid na ket inbaga na pay nga insalakan na laeng ti bagi na ta ti biktima iti immuna a nangkabil kenkuana.
