VIGAN CITY – Nakasagana iti pamilya ni Jovelita Romino Ucillos nga agtawen iti innem a pulo ket tallo, balo ken agnaed idiay Barangay Dacutan, Magsingal a mangipila iti darum kontra iti nagmaneho ti kurong-kurong a ni Ryan Ullero Butas nga agtawen iti tallo pulo ket walo, baro ken agnaed idiay Bungro, Magsingal a nakadungpar kenkuana a poon iti nakatayan na.
Ti aksidente ket napasamak idi alas dos y media iti malem ti June 11 iti agdama a tawen idiay national highway ti Barangay Sta. Monica, Magsingal.
Segun ken ni Police Major Anthony Otinguey, hepe ti Magsingal municipal police station, naipan idiay Magsingal District Hospital ti biktima ket maitaray kuma iti sabali nga ospital idi bigla a nagawan lattan iti poon na ket isun iti ipapatay na.
Kabayatanna, ni met Butas ket naipaagas met idiay Ilocos Sur Provincial Hospital- Gabriela Silang ta nagsagaba met iti dunor iti naduma-duma a paset iti bagi na gapu iti aksidente.
Maibasar iti inisyal nga imbestigasyon, agpapa-abagatan a direksyon iti kurong-kurong idi aksidente a nadungpar na iti bimmallasiw a biktima iti national highway.
