VIGAN CITY – Addan iti inisiyal a nagpatangan dagiti kameng ti pamilia ti natay a menor de edad a nadungpar ti maysa a bus idiay Brgy. Bayugao Oeste, Sta. Cruz idi agsapa idi kalman.
Pinasingkedan ni Police Executive Master Sergeant Edmund Beronilla ti Sta. Cruz municipal police station, agpapa-amiyanan ti bus a minaneho ni Albert Bilen, agtawen ti uppat a pulo ket maysa a taga-Mabilbila Sur, Santa idi dinungpar iti napaspas iti taray na a motorsiklo a minaneho ni Darwin Duenas nga agtawen ti sangapulo ket pito nga agnaed idiay Villa Garcia, Sta. Cruz nga agpa-abagatan a direksyon.
Gapu iti kinapigsa ti panangdungpar ti biktima iti kinasinnabet na a bus, naipasirok ti biktima ket naisagad-sagad pay iti sumagmamano a metro agingga a naipaigid iti kalsada.
Nagsagaba iti nakaro a dunor iti ulo ken naduma-duma a paset iti bagi na kasta pay a napitpit a perme iti nagluganan ti biktima a puon ti nakatayanna.
Innayon ni Beronilla a saan a ginandat ti driver ti bus iti aglibas no di ket nagkamang ti maysa a barangay official ta nagamak idi immasideg iti lugar a nakapasamakan iti aksidente dagiti kakabagyan ti biktima.
