VIGAN CITY – Maiyur-uray pay laeng iti desisyon ti pamilya dagiti natay iti aksidente idiay Brgy. Guimod Sur, San Juan idi naminsan a rabii a da Eric Vivit, agtawen ti uppat a pulo ket tallo nga agnaed idiay Brgy. Parada, Sto. Domingo ken nagmaneho iti Mio 125 a motorsiklo ken ti kinalubbonna a ni Julius Ventura a taga -Pangasinan ngem agnanaed idiay Barangay Parada, Sto. Domingo.
Ti pannaki-uman ti Bombo Radyo Vigan ken ni Police Master Sergeant Lawrence Lagasca, imbestigador ti San Juan municipal police station, mapapati a nabartek dagiti biktima agsipud ta agiwes-iwes iti nagluganan da a motorsiklo nga agpa-amianan a direksion ket naagaw da iti linya iti nakasinnabet da a trailer truck a minaneho ni Rolly Adolfo, agtawen ti tallo pulo ket pito a taga-Bacoor, Cavite.
Agsipud iti dayta, nawara ti ulo dagiti biktima ken adda pay iti naisina ti takyag na kadakuada gapu iti kinapigsa iti impact iti pannakaidungpar da iti sangwanan ti trailer truck.
Malaksid iti dayta, arigna napitpit ken awan nagbalbalinan na iti motorsiklo a nagluganan dagiti biktima.
