VIGAN CITY – Awan pay laeng iti nagpatangan iti pamilya dagiti natay a nagkalubbon iti motorsiklo ken ti nagmaneho iti kotse a kinadinnungpar da idi alas dyes singkuwenta iti rabii ti September 26 idiay national highway ti Poblacion East, San Ildefonso.
Nabigbig dagiti nagkalubbon iti motorsiklo a da Jervy Alasaas nga agtawen ti tallo pulo nga agnaed idiay Malingeb, Bantay kenni Edwin Ragadi nga agtawen ti uppat a pulo ket uppat nga agnaed idiay Sinabaan, Sta. Catalina idinto a ti nagmaneho ti Honda Civic a nakadinnungpar da ket ni Francis Benedict Gonzales nga agtawen ti dua pulo ket tallo nga agnaed idiay Nalasin, Sto. Domingo.
Segun ken ni Police Lt. Danilo Ricud, hepe ti San Ildefonso municipal police station, nakasagana ni Gonzales a makipatang kadagiti pamilya da Alasaas kenni Ragadi tapnu marisoten iti napasamak.
Maibasar iti inisyal nga imbestigasyon, agpapa-amyanan iti motorsiklo a nagluganan dagiti dua idi mapapati nga inagaw da iti linya ti kotse nga aggapu iti abagatan a direksyon isu a napasamak iti aksidente a nakatayan dagiti dua ta nagsagaba da iti nakaro a dunor iti ulo ken naduma-duma a paset iti bagi da.
