VIGAN CITY – Nagpanawagan iti gobierno ken ti embahada ti pamilia ti OFW a nagpakamatay idiay Kuwait babaen iti panagtapuakna iti maikawalo a kadsaaran ti pagkaskaseraanna a maiyawid ditoy pagilian ti na-cremate a bangkayna kagiddan iti panangnamnamada a negatibo iti COVID19 ti biktima.
Iti pannaki-uman ti Bombo Radyo Vigan ken ni Jenibib Biag, kaanakan ti biktima a ni Elmer Biag, agtawen ti tallopulo a maysa a fast food crew iti nasao a pagilian, naudin a nakapatangna ti ulitegna idi May 21 a ti naibaga kenkuana ti biktima ket awan ti pagsapulanda gapu iti lockdown ken saanna pay kayat iti agparang iti pamilianan no ag-video call da.
Agsipud idi naibaga ti suspek iti pamiliana a masakit ket nabalakadan a mapan agpaagas ngem kunana nga awan iti pagpaagasna ta saan met nga agswelsweldon.
Natakuatan pay a timmulong isuna iti maysa a COVID19 patient a taga-La Union isu a mapapati a naakaran ta idi naidalan iti autopsy ti bangkayna ket nakitaan iti sintomas.
Segun met ti ina ti biktima a ni Emily Biag, tawen 2012 pay laeng nga addan idiay Kuwait ti biktima nga agtrabtrabaho isu a kayatna a makita iti maudin a gundaway ti anakna a saanna unay nadendennaan.
No pay kasta, dua ti putot ti biktima a pinanawanna ken kasta metten iti asawana a mapapati pay nga adda iti saanda a pagkinnaawatan.
