VIGAN CITY – Nakapagsaritan ti pamilia ti nakamotorsiklo a natay ken ti driver ken operator ti passenger truck bus a nakadinnungparna idiay Barangay Rizal, Cabugao, Ilocos Sur idi June 24, 2024 iti alas dies baente singko iti rabii.
Iti pannaki-uman ti Bombo Radyo Vigan ken ni PMaj. Juan Jhayar Maggay manipod Cabugao Municipal Police Station, napasamak idi rabii iti June 24 ti aksidente a nakairamanan ti nagmotorsiklo a ni Rogielito Vasquez Tangonan, agtawen iti limapulo, delivery rider, taga-Barangay Dadalaquiten Norte, Sinait idinto a ti Hyundai Passenger Truck Bus ket minaneho ni Joel Ramirez Conrado, agtawen iti limapulo ket innem, taga-Barangay Bulag, Bantay.
Segun ken ni Maggay, bayat nga agpadaya ti passenger truck bus ket nakadinnungparna ti napaspas a pataray ti motorsiklo nga agpaamianan a direksyon.
Gapu ti impact iti aksidente ket nagsagaba ti nakaru a dunor ti driver ti motorsiklo isu a naipan iti ospital para ti pannakatamingna ngem bayat a maag-agasan ket pimmusay.
Nagpalagip ni Maggay kadagiti amin a motista iti panagannad nu agmanmaneho ta masapul ti agbalin a nasipot ken naalibtak tapno maliklikan a maaksidente.
VIDEO – PMAJ. JUAN JHAYAR MAGGAY
