Burburtia pay laeng para iti ama ti maysa a lalaki a natay kalpasan a napaltugan idiay Barangay VI, Pagpandayan, Vigan City, Ilocos Sur.
Ti biktima ket ni John Noriega Jr., agtawen iti tallopulo ket siam, agnaed iti Zone V, Bantay.
Iti pannaki-uman ti Bombo Radyo Vigan ken ni John Noriega Sr., awan pulos ti nadakdakamat ti putotna a nakaririna ta saan pay unay a rumrummuar iti pagtaenganda.
Innayon ni Noriega a pudno nga adu ti tattoo iti bagi ti putotna ngem saan daytoy nga ex-convict ken saan a dakes a tao.
Maipalagip a ti biktima ket nakalugan iti traysikel idi sinaruno dagiti suspek sa pinaltuganda iti naminsan a daras iti ulona a puon ti nakatayanna.
Agtultuloy latta ti imbestigasion dagiti panakabagi ti linteg tapno maammuan ti motibo ti pasamak ken matunton dagiti suspek.
