Agikkat ti amin a Singson iti puestoda iti pulitika no mapaneknekan nga adda black sand mining iti Ilocos Sur.
Dayta ti pinasingkedan ni dati a Governor Chavit Singson iti baet ti panangipabasul ni Vigan City Mayor Bonito Singson nga isuna ti mangidadaulo iti black sand mining operation iti kabaybayan a paset ti Santa ken Caoayan.
Iti pannaki-uman ti Bombo Radyo Vigan ken ni dati a Governor Singson, kontraenna dagiti mangibagbaga a adda black sand mining ti mapaspasamak a dredging operation iti kabaybayan.
Kunana a saanna a dadaelen ti naganda agsipud ta daytoy ket isyu laeng dagiti inawaganna a ‘salawasaw’ a mangpadpadakes kadakuada.
Nupay kasta, kinaritna dagiti mangibagbaga a mapanda bantayan dagiti mangisaysayangkat iti dreding operation ta mangted iti maysa a milion a pisos no mapaneknekanda a ‘black sand mining’ ti maar-aramid.
Kiddaw ti dati nga opisial a saan ida a dadaelan ta agtaltalna ken awan ti dakes nga ar-aramiden ti pamiliada no di ket kayatda laeng a tulongan dagiti umili.
