Saan a ninamnama ti pamilia ni PLTGEN. Jose Melencio Nartatez Jr a tubo iti Santa, Ilocos Sur ti panangpili kenkuana ni Presidente Ferdinand Bongbong Marcos Jr kas mangidaulo iti Philippine National Police, kasukat ni PGen. Nicolas Torre III a naikkat iti puesto.
Iti pannaki-uman ti Bombo Radyo Vigan ken ni Francis Melencio Nartatez III, nakigtotda idi damo ken impagarupda a fake news ta saan pay met a nagun-uni kadakuada ti kabsatna.
Nupay kasta, maragsakanda iti pannakapilina kas baro a mangidaulo iti PNP ta ammoda a deretso ti naimbag a serbisyo ti kabsatna.
Inladawan ni Nartatez III ti kabsatna a nastrikto, natulnog iti linteg, ken napudno iti trabahona.
Isu pay ti agserserbi a pannaka-amadan nga uppat nga agkakabsat sipud pimmusay ti amada.
Ni Nartatez ti agdama nga Area Police Commander iti Western Mindanao.
Nagserbi a PNP Deputy Chief for Administration ken director ti Metro Manila police, Calabarzon police, Directorate for Intelligence, ken Directorate for Comptrollership.
Nagbalin pay a provincial director idiay Ilocos Norte ken iniggananna dagiti dadduma a puesto iti intelligence ken investigations idiay Laguna.
Sakbay a naidestino idiay Mindanao, ni Nartatez ti second in command ti PNP ken nagbalin a frontrunner para iti kina-PNP chief.
