Imbelleng ti Sandiganbayan ti dua a kaso nga agsina a mainaig iti ill-gotten wealth ken coco levy funds kontra iti pamilia Marcos ken Romualdez gapu iti procedural ken legal nga isyu.
Iti umuna a kaso, imbelleng ti Second Division ti 1987 coco levy civil case kontra ken ni dati a Presidente Ferdinand Marcos Sr., Imelda Marcos, ken Juan Ponce Enrile gapu iti “inordinate delay” wenno ti nabayag a panangiproseso ti kaso.
Segun iti korte, ti dandani uppat a pulo a tawen a panagdenggeg ket aglabsing iti karbengan dagiti akusado iti napardas a panag-resolba ti kaso.
Kabayatanna, imbasura met ti Sixth Division ti kaso ti gobierno tapno makumpiskar ti nasurok $5 milyon a maipagarup a saan a mailawlawag a baknang ti pimmusay a dati a Leyte Governor Benjamin “Kokoy” Romualdez ken ti asawana.
Basar iti decision, saan a mabalin a pakibiangan ti Sixth Division ti immuna a bilin ti Fourth Division a nangwaya-waya iti nadakamat a pondo idi tawen 2025 kas panangsurot iti judicial stability wenno non-interference iti kapada a sangay ti korte.
