VIGAN CITY – Nagturong iti aksidente ti naragsak a panag-bonding ti maysa a pamilia a naggapu iti baybay gapu ta natay ti ama a drayber kalpasan a natulid ti tricab a naglugananda.
Napasamak ti aksidente iti provincial road ti Barangay Codoog, Narvacan, Ilocos Sur.
Nabigbig ti nagmaneho iti Red Chariot Motor Vehicle a ni Crisanto Supnet, agtawen iti uppat a pulo ket siam, inluganna ti asawana a ni Aricelli Supnet, agtawen iti uppat a pulo ken dagiti uppat nga annakda a menor de edad nga agtawen iti sangapulo ket lima, sangapulo ket tallo, siam, ken agtawen iti walo nga agpapada a taga-Brgy Marozo, Narvacan.
Iti imbestigasyon dagiti pannakabagi ti linteg, agpapa-amianan a direksyon ti tricab iti provincial road idin ta saan a nakontrol ti drayber ti manibela ti lugan ket naidungparda iti concrete barrier isu nga agpapadada a natulid.
Nagsagrap ti fatal injury ti biktima partikular iti barukongna idinto a minor injuries ti sinagaba dagiti pashaero.
Naipan iti Ilocos Sur District Hospital Narvacan ti drayber ngem naideklarar a dead on arrival ken natakuatan a nakainom iti arak.
Iti pannaki-uman ti Bombo Radyo Vigan ken ni Arceli, nainayad met nga agmanmaneho ti asawana a makiinnistorya pay kadagiti annakna idin ta bigla a nagtulid ti lugan.
Idi matuliddan, sinaggaysana a binangon dagiti annakna ken saannan a napuotan nga uray isuna ket nadunor met laeng.
Kunana nga agawidda koman idi napasamak ti aksidente ta naggapuda iti baybay nga iti dayta idi a kanito ket nakaragragsakda pay laeng.
