Nakoronaan a Miss Universe 2025 ti pambato ti Mexico a ni Fatima Bosch babaen iti reigning queen a ni Victoria Theilvig manipud Denmark.
Iti question and answer portion, nasaludsod ni Bosch no ania dagiti karit ti panagbalin a babai ita a tawen ken kasanona nga aramaten ti titulo ti Miss Universe tapno makabukel iti natalged nga espasio para kadagiti babbai iti lubong?
Insungbat ti pambato ti Mexico a kas Miss Universe, ipaayna ti timek ken turayna iti panagserbi iti sabali, ta ita a panawen, napateg ti agsarita, mangaramid iti panagbalbaliw ken magun-od ti amin, ta dagiti babbai a natured a tumaktakder ket dagiti babbai a makaaramid iti pakasaritaan.
Kabayatanna, iti final question, nasaludsod manen ti kandidata no kasanona nga aramaten daytoy a plataporma tapno ipaayan iti pigsa dagiti agtutubo a babbai?
Insungbatna a kas Miss Universe, ibagana kadakuada a mamatida iti bileg ti panagbalin a napudno. Agtalek iti bagi. Napateg ti arapaapda, napateg ti pusoda. Ken saanda a bay-an a pukawen ti asino man ti talekda iti bagida. Addaanda iti turay ken nasken a mangngegan ti timekda.
Kabayatanna, nangibati iti dakkel nga impact ti pambato ti Pilipinas iti Miss Universe 2025 a ni Ahtisa Manalo iti Question and Answer segment.
Iti immuna a saludsod, insungbat ni Manalo a kayatna ti agbalin nga imahe ti namnama kadagiti tao ken iti tawenna a sangapulo, rinugianna ti sumali kadagiti pageant tapno makaadal ken mailung-aw ti pamiliana iti kinarigat.
Iti met final Q&A, kinuna ni Manalo nga agtultuloy ti panagtulongna iti Alon Akademie ken kayatna a tulongan dagiti agtutubo a Pilipino a makalung-aw ken ragpaten dagiti arapaapda.
Nagleppas ti pambato ti pagilian iti 3rd runner up iti Miss Universe 2025.
