VIGAN CITY – Panaglabsing ti Republic Act 10591 iti sangwen ni Fredo De Peralta, agtawen iti innem a pulo ket walo, naasawaan, awanan trabaho nga agnaed idiay Brgy. Pantay Tamurong, Caoayan.
Iti pannaki-uman ti Bombo Radyo Vigan ken ni PCapt. Joseph Bantullay, nakaawatda ti report ken ni Rocky de Peralta a putot ni Fredo iti 12 guage buckshot nga awan markingna ta mapapati nga inaramat ti amana dayta a pangbubuteng kadakuada.
Segun ken ni Bantulay, impaima ti paltog da Rocky, kabsatna a ni Frederick ken inana a ni Agnes kadagiti nagresponde a PNP personnel a kukua ti amada.
Mapapati a tunggal makainom ti suspek ket aramatenna iti paltog a pangbubuteng ken panangpangtana a dangranna ti pamiliana isu nga inkeddeng dagiti annakna ken asawan ti panangisukodan ti igamna.
Ti nasao a paltog nga adda uppat a balana ket naipan iti Coayan Police Station para iti proper disposition.
