VIGAN CITY – Agtultuloy iti imbestigasyon iti mapapati a panagtakawan iti pagtaengan ti maysa nga investigation agent idiay Zone 3, Brgy. Suso, Sta. Maria.
Ti biktima ket ni Talek Corotan, agtawen iti uppat a pulo ket tallo, naasawaan nga agdama a na-assign iti PDEA Regional Office II, a tubo idiay Brgy. Saranay, Cabaroan, Isabela ngem agnaed idiay Brgy. Suso, Sta. Maria idinto a saan a nabigbig ti suspek.
Iti pannaki-uman ti Bombo Radyo Vigan ken ni PCapt. Joel Dasargo iti Sta. Maria Police Station, sakbay iti insidente ket nakariing itay parbangon ni Corotan gapu iti panag-alarm iti cellphone-na nga adda iti bakante a kuarto iti amianan a paset iti pagtaenganna isu a napanna insardeng ket nagsubli met laeng iti kuartona ngem iti alas sais iti bigat ket idi kitaennan dagiti gamitna ket napansinna a mapukpukawen.
Dagiti mapukpukaw ket pakairamanan ti cellphone ken sling bag a naglaon iti maysa nga unit iti Cal. 45 Norinco, issued firearm nga adda serial number-na a BA 12033, tallo a piraso iti magazine nga adda sangapulo ket siam a balana, maysa nga ATM land bank payroll card, GSIS UMID Card, driver’s license, PRC ID, Health card, photocopy iti OR/CR iti motorsiklo, Palawan ID card, maysa a Samsung tablet nga aggatad iti pito ribo a pisos ken maysa nga A22 Samsung 5G touchscreen globe plan.
Segun ken ni Dasargo, patienda a masansan iti nasao a pagtaengan ti nangala dagiti mapukpukaw a gamit ta saan a nadaras para iti agdadamo a mapan iti agala lattan.
Allukoyen ni Dasargo dagiti residente wenno nakakita a makitinnulong iti nasao a panagtakawan tapno masolbar iti nasao nga insidente ken kiddawna a saan koman a maulit pay.
