VIGAN CITY – Pinaltugan dagiti saan pay a nabigbig a suspek ti pagtaengan dagiti dua a biktima idiay Barangay Naglaoa-an, Sto. Domingo.
Nabigbig dagiti biktima a da Reynaldo Goimmayen Domingo, agtawen iti limapulo ket uppat ken ni Melvin Tacla Domingo, agtawen iti tallopulo ket dua, agpada nga agnaed iti nasao a barangay.
Dagiti lallaki a suspek a saan pay nga ammo ti pakabigbiganda ngem nakasuotda iti jacket ken helmet bayat a nakaluganda iti TMX motorcycle.
Dimteng dagiti suspek iti lugar ket pinaputukanda iti namin-ano a daras ti pagtaengan dagiti biktima babaen ti mapapati a caliber 45 pistol nga inaramatda kas maibasar ti narekobre a pito a buli ken dua a deformed slug ti isu met laeng a paltog.
Naglibas dagiti suspek kalpasan ti pasamak idinto a nangiwayat met nga insigida dagiti pannakabagi ti linteg iti hot pursuit operation ngem saanda a natiliw.
