VIGAN CITY – Inlawlawag ni Atty. Roger Paz dagiti pagsayaatan ken pagdaksan iti pannakaaprubar ti Absolute Divorce Bill a naaprubaranen iti maikatlo ken maudi a panangibasa ti kamara.
Iti pannaki-uman ti Bombo Radyo Vigan ken ni Atty. Paz, ad-adu ti maitedna a pagsayaatan iti pamilia ti divorce ta nalaklaka ti mangwaswas iti kasar a saanen a kasapulan pay a dumalan iti annulment.
Ngem kunana a no adda met divorce, nalakan ti agsina ken mangwaswas iti kasar isu a nalaklaka met a madadael ti pamilia ken maawanan ti nagannak dagiti ubbing.
Nupay kasta, ibilang ni Atty Paz a “moving forward” daytoy nga addang ta maysa ti Pilipinas kadagiti dua a pagilian (Vatican) nga awan ti paglinteganna iti diborsyo.
No saanen a bibiangan dagiti senador ti Divorce Bill, mabalinen a mayendorso iti Office of the President ngem no adda insertion wenno kayat nga inayon ti senado, mapasamak pay ti bicameral conference tapno maurnos dagiti linaonna.
Ngem no saan a napermaan ti presidente iti uneg ti tallopulo nga aldaw sipud addan iti opisinanan ti gakat, ag-lapse into law wenno agbalinen a linteg ket sumarunonto met a mairuar ti Implementing Rules and Regulations na tapno makita no ania dagiti grounds wenno pagannurotan iti panagdiborsyo.
