VIGAN CITY – Makitaripnong inton Lunes (August 17) ni Provincial Board Member Efren “Rambo” Rafanan kadagiti kameng ti media ditoy Ilocos Sur tapno mapagtutulagan ti ordinansa a maipatungpal kontra kadagiti saan a responsable nga agar-aramat iti social media.
Dayta ket kalpasan nga adu dagiti netizen a nagipablaak iti social media ti napasamak a rinnupak iti nagbaetan ti New People’s Army ken ti militar iti ili ti Sta. Lucia ken San Emilio a saan koma a rumbeng a maaramid.
Iti pannaki-uman ti Bombo Radyo Vigan ken ni Rafanan, saan a nasayaat a makitkita ti publiko dagiti saan a na-censor a ladawan dagiti natay a terorista ken uray pay dagiti dadduma a biktima iti aksidente wenno krimen ta sensitibo la unay kadagiti kameng ti pamiliada a makakita.
Malaksid ti dayta, ingunamgunam ni Rafanan a saan a rumbeng a maipakita dagiti ladawan wenno video dagiti manarimaan a rinnupak tapno masalwadan dagiti kameng ti militar a mangpatalinaed ti linak ken talna iti lugar.
Makikammayet ti opisial kadagiti IT expert ken dagiti legal officer tapno mapagpapatangan dagiti pannusa a maipakat kadagiti aglabsing iti mabukel a paglintegan.
