VIGAN CITY – Napatgan ti maysa kadagiti kalikagum ti National Food Authority (NFA) – Ilocos Sur babaen ti panangidaulo ni Provincial Manager Leny Sanedrin a malukatan ti Tomato Paste Plant Warehouse idiay Santa nga isu ti pagipenpenan ti irik, ta awan iti dakkel a bodegada a pangipananda kadagiti gatangenda nga irik.
Pinasingkedan ni Sanedrin a daytoy ket paset ti suporta nga ipapaay ti provincial government of Ilocos Sur tapnun magatangda ken maidulinda a nasayaat dagiti gatangenda nga irik kadagiti mannalon.
Kabaelan a launen ti warehouse ti sumurok kumurang 50,000 a sako ti irik.
Maipalagip a nagbalin a parikot dagiti mannalon iti presyo ti irik nga apitda ta nalaka tunggal kilo, ngem inpanamnama ti provincial government babaen kenni Governor Ryan Singson a sanggaenda ti presyo dagiti maapitda nga irik ket gatangen ti NFA, isuna laeng ta kasapulan a surutenda ti pagannurutan ti ahensya a nadalus dagiti ilako dagiti mannalon kadakuada.
