VIGAN CITY – Awan ti maipapatungpal a lockdown iti pagilian ti Sweden uray pay no agtultuloy ti panagraira ti COVID19iti intero a lubong kas pinasingkedan ni Bombo International Correspondent Merly Lustig nga Overseas Filipino Worker iti nasao a pagilian.
Segun kenni Lustig, saan a kapilitan iti panagaramat iti face mask no rumuar ngem kasapulan a masurot latta iti social distancing tapno maliklikan iti tunggal maysa ti nasao a virus.
Kasta pay a nakunana a nakalukat met amin a restaurant ngem agiinnaddayo dagiti lamisaan tapno saan nga agdudupudop dagiti kustomer a mapan mangan.
Kabayatanna, nakalukat latta dagiti pagadalan iti kindergarten agingga high school ngem saan kadagiti uniersidad ken insingasing ti gobiernoda a no adda sakit a sagsagabaen ti maysa nga agindeg iti nasao a pagilian ket rumbeng nga agtalinaedda kadagiti pagtaenganda tapno saanda a makaakar iti sabali.
