Pinasingkedan ni Bombo International Correspondent George Ingram a tubo iti ili iti Santa, nga agad-adal idiay United Kingdom nga iti kangitingitan COVID19 crisis ti pagilianda ket nakasagana latta ti gobiernoda a mangsuportar iti kasapulan dagiti naapektaran pakairamanan dagiti Pilipino ta kaaduan ket naawanan ti trabaho.
Segun ken ni Ingram, adda iti inyetnag ti United Kingdom a mangtulong kadagiti agindeg ken mangmangged a no man bilang nga adda didigra a sumangbay.
Kabayatanna, kas panangliklik iti panagraira ti COVID19 ket naipasardeng pay laeng ti klase dagiti agad-adal ngem adda ti online classes para kadakuada ket no pay kasta, maited latta ti mayyannatup a grado kadakuada uray pay no nakanselar amin nga exam.
No saan a napateg ti papanan ket saanda a mapalubosan a rumuar ken mamuelta dagiti aglabsing ngem kunana a saan unay a nainget ti pannakaipatungpal dagiti pagannurotan ta napaliiwna a naing-inget paydagiti maipatpatungpal kadagiti sabali a pagilian.
Agtultuloy met ti panangipalagip kadakuada ni UK Prime Minister Boris Johnson a madama tatta nga agpapalaing kalpasan iti panagpositibona iti nasao a sakit ket kunana nga agtalined ti tunggal maysa iti uneg ti pagtaenganda para iti kinatalged ti amin.
