Nagdispensar ti PAGCOR Senior Vice President for Security Raul Villanueva kadagiti dati a hepe ti national police mainaig iti saan pay a naberipika nga impormasyon nga inbingay na iti Senate hearing nga adda iti payola dagiti POGOs ti dati a hepe ti PNP.
Iti hearing, indatag ni Senador Ronald ‘Bato’ dela Rosa, dati met a hepe ti PNP, ti statement ti Council of Chiefs wenno ti asosasion dagiti dati a hepe ti national police.
Kinondenar ti grupo ti statement nga inaramid ni Villanueva ken inawaganda ti statement a ‘sweeping accusation’ a nangrugit iti reputasion dagiti dati a hepe ti PNP.
Mainaig iti daytoy, kiniddaw ni Villanueva ti pammakawan kadagiti dati a hepe ti PNP no daytoy ti interpretasion ti grupo.
Inyunay-unay ni Villanueva a dakkel ti respeto na kadagiti dati a hepe ti PNP.
Gapu dayta, binagaan ni Dela Rosa ni Villanueva a kas maysa a retirado a heneral ket nasken nga agannad iti panangipakaammo iti saan a verified information.
