Pumaspas ti panag-monitor iti kasasaad iti panawen kalpasan nga inrusat ti Philippine Atmospheric, Geophysical and Astronomical Services Administration (PAGASA) ti PANaHON Weather App.
Nairusat ti app iti Pagasa Science Garden kagiddan ti panagrambak ti Typhoon and Flood Awareness Week ita June 15.
Ti PANaHON wenno Pagasa National Hydro-Met Observing Network Mobile App ket opisyal nga smartphone application iti Pagasa a mangmangted ti real-time updates, maps ken hazard warning para kadagiti Pilipino.
Babaen ti app ket mabalin a makaawat nga insigida ti impormasyon maipanggep ti tudo, bagyo, panaglayos ken dadduma pay a kasasaad iti panawen kas maibasar ti lokasyon iti agar-aramat.
Mabalin pay nga i-download kadagiti android ken IOS devices iti nasao nga app.
Target ti Pagasa a patibkeren ti panagsagana dagiti Pilipino iti epekto dagiti bagyo ken dadduma pay nga extreme weather events.
