Vigan City – Nagpalagip ti Philippine Statistics Authority ditoy probinsiya nga inton agsubli iti operasyon da inton Lunes, May ket adda dagiti napagnunumuan da a pagannurutan nga isu iti maipatungpal tapnu mapagtalinaed ti physical distancing ta ammo da nga adu manen dagiti mapan mangala kadagiti kasapulan da a dokumento kas ti birth certificate ken certificate of no marriage.
Segun ken ni Provincial Statistics Officer Reynor Fernando, sangagasut a kliyente laeng iti akomodarenda ti kada aldaw ta sangapulo ket lima a kliyente kada oras iti asikasoen da ta masurot ti 1.5 wenno 2 a metro a distansiya ti tunggal maysa tapno maliklikan ti COVID-19.
Malaksid iti dayta, masapul nga ag-facemask dagiti mapan iti opisina ta nu awan ti facemask da ket saan da a mabalin a sumrek.
No met aglabes ti bilang dagiti mapan ti maysa nga aldaw, mangtedda ti numero kadagiti kliyente a saan a naasikaso ta iti sumaruno nga aldaw ket isuda iti maipangruna a maserbiyan.
Kiddawen ni Fernando kadagiti mapan agala ti dokumento a saandan nga agitugot kadagiti kakaduada ket no senior citizen ti kliyente, maysa laeng ti mangkuyog kenkuana ken rumbeng nga ammodan dagiti requirements dagiti alaenda tapno saandan a mangtaktak.
Kabayatanna, inton September 1 agingga 29 ket isu iti panangrugi ti census para ti Philippine ID kas paset iti pannakaipatungpal ti National ID system ditoy pagilian.
