VIGAN CITY – Kiddaw ti Department of Education (DepEd) kadagiti Local Government Unit (LGU) iti intero a pagilian a liklikan a pagbalinen nga evacuation centers dagiti pagadalan iti panagtutudo ta agresulta iti pannakatantan nga agadal dagiti estudyante.
Segun ken ni Spokesperson Undersecretary Michael Poa, impakaammona dayta iti kaudian a taripnong kadua ti National Disaster Risk Reduction and Management Council (NDRRMC).
Kinunana nga adda gundaway nga agpaut ti panagtalinaed dagiti evacuee kadagiti pagadalan a pakariribokan nga agadal dagiti estudyente.
Maibasar ti DepEd Order 37 a pinirmaan ni Vice President ken Education Secretary Sara Duterte, mabalin nga aramaten dagiti pagadalan kas immediate evacuation site iti panawen ti didigra ngem saan a rumbeng nga aglabes iti sangapulo ket lima nga aldaw.
