VIGAN CITY– Mangbukel ti technical working group ti Kamara a mangisangsangkamaysa kadagiti gakat para iti maikadwa a package ti Tax Reform and Inclusion (TRAIN) Law tapno makabukel da ti substitute bill kalpasan a naapprubaran ti package 2 iti House Committee on Ways and Means.
Ti pannakiuman ti Bombo Radyo Vigan kenni committee chairman ken Quirino Rep. Dakila Cua, inbaga na nga awan ti mainayun a buwis iti package no di ket pababaen na ti corporate income tax ken mangidiaya ti tax incentives tapno ad-ado ti maallukoy nga investors nga agnegosyo ditoy pagilian .
Inlawlawag ni Cua a dakkel ti nagdumaan iti Package 1 ken Package 2 gapu ta iti barbaro a package ket tarigagay na a mapabaro dagiti tax incentives ken mapasayaat ti ‘investment climate’ iti pagilian .
Kabayatanna, inpaganetget ti committee chairman a saan a ti TRAIN law ti rason no apay a ngimmina dagiti kangrunaan a magatang nangruna iti produkto petrolyo no di ket gapu iti panagpangato ti presyo idiay world market.
