Kinuestionaran dagiti senador ti pabahay program ti Department of Human Settlements and Urban Development (DHSUD)
Target ti DHSUD ti panagbangon iti 3.2 million housing units babaen kadagiti medium ken high rise buildings wenno condominiums agingga a malpas ti termino ni President Ferdinand Marcos Jr iti tawen 2028.
Segun kenni Senador Cynthia Villar, mandato ti DHSUD ti panangtulong kadagiti marigrigat ken awanan pagtaengan a Pilipino, ngem dagiti maibangon a condo ket para kadagiti middle class.
Gapu dayta, insingasing ni Villar a maiwaras lattan dagiti daga kadagiti marigrigat tapno makabangonda iti bukodda a pagtaengan.
Kabayatanna, inlawlawag ni Senador Risa Hontiveros, sponsor iti singasing a badyet ti DHSUD, a dagiti maibangon a condo units ket adda binulan a bayad a P2,600, a mabalin a bumaba iti P1,500 gapu iti subsidiya.
Kinunana pay nga adda dagiti dadduma a proyekto ti housing project a pinunduan ti gobierno para kadagiti marigrigat, kas kadagiti programa ti National Housing Authority (NHA).
Iti agdama, saan pay nga inaprobaran ti Senate plenary ti singasing a badyet ti DHSUD gapu kadagiti saludsod ni Senador Villar.
