Umabot iti nasurok P647 milyon a pondo ti Commission on Higher Education para iti scholarship grants ti agtaltalinaed a saan pay a na-liquidate, segun ti 2024 annual audit report ti Commission on Audit (COA).
Segun ti state auditors, dagiti saan pay na-liquidate a pondo ket manipud ti CHED Regional office IV-B ken Regional office XII a nailatang para iti CHED Merit Scholarship Programs (CMSPs) manipud ti school years 2019-2020 agingga 2023-2024.
Pinasingkedan ti COA a dagiti pondo ket naipaay kadagiti agduduma a higher education institutions, pakairamanan ti state ken local universities ngem awan pay ti naipasa a kumpleto a liquidation reports manipud kadagiti pagadalan.
Gapu daytoy ket marigatan dagiti auditors a maammuan no nasayaat ken mayataday iti pagannurotan ti panagusar ti pondo. Reynand Fontejon
