Nabiktima iti budol-budol ti maysa a senior citizen a babai kalpasan ti panangitaray dagiti uppat a saan pay nabigbig a suspek iti mapatta-patta a P500,000 a gatad ti alahasna idiay Barangay San Jose, Narvacan, Ilocos Sur.
Ti biktima ket agtawen iti innem a pulo ket lima, agnaed iti nasao a barangay.
Dagiti suspek a pakairamanan ti maysa a masikug a babai ken maysa nga LBGBTQ member ket nagpayam-ammo a kameng ti Department of Social Welfare and Development.
Immuna a nagsaludsod dagiti suspek iti maysa a boarding house sakbay a kiniddawda a mangisayangkatda iti survey mainaig iti kasasaad dagiti agindeg.
Gapu ta namati ti biktima a pudno a kameng ti gobierno dagiti suspek, pinastrekna ida iti pagtaenganda.
Kabayatan ti panagpatang dagiti suspek ken ti biktima, in-inut a naalada ti talek ti biktima ket naallukoyda daytoy nga iruar dagiti napateg nga alikamenna agraman dagiti alahas ken gadget.
Kalpasan a maalada dagiti alahas nga aggatad iti nasurok-kumurang P500,000, napaspas a naglibas dagiti dua a suspek a naglugan iti maysa a Suzuki Ertiga.
Makita pay iti CCTV nga adda dua a kakunsabus dagiti suspek – maysa ti agpalpaliiw iti aglawlaw ti biktima idinto a ti maysa ket nagserbi a driver ti getaway vehicle.
Agtultuloy ti imbestigasion dagiti pannakabagi ti linteg tapno maammuan ti pakabigbigan dagiti suspek ken maipila ti kaso kontra kadakuada.
Naisayangkat payen ti hot pursuit operation ken napakaammoanen dagiti kabangibang a police station para iti posible a pannakakemmeg dagiti suspek.
