Nangipila ti lider ti House of Representatives ti gakat a mangpataw iti muelta nga umabot iti P50 million kadagiti social media platform a mapaay a sumurot kadagiti pagannurotan iti online child safety.
Impila da Speaker Faustino “Bojie” Dy III ken Majority Leader Sandro Marcos ti House Bill No. 9965 wenno Children’s Social Media Safety Act a gagem a mangiyetnag iti komprehensibo a regulasyon iti panagaramat iti social media kadagiti ubbing babaen iti naing-inget a dusa kadagiti platform, parental supervision, ken digital safety standards.
Iti salinong ti gakat, maiparit kadagiti ubbing nga agtawen iti sangapulo ket tallo agpababa ti panagaramid ken panagaramat iti social media accounts.
Nabilin pay dagiti platform a mangipatungpal iti mapangnamnamaan nga age verification system.
Kabayatanna, dagiti agtawen iti sangapulo ket tallo agingga sangapulo ket walo ket mapalubosan nga agaramat iti social media no adda beripikado a pammalubos ken agtultuloy a panangtarabay dagiti nagannak wenno guardian.
