Nagisubli ti P316.3 million dagiti state witness kas paset iti pannakitinnulongda iti gobierno maipanggep ti flood control scam kas kinuna ti Department of Justice (DOJ).
Karaman kadagiti state witness a nakaipasidong iti Witness Protection Program da dati a Department of Public Works and Highways (DPWH) Undersecretary Roberto Bernardo, Bulacan First District Engineer Henry Alcantara, National Capital Region Regional Director Gerard Opulencia ken contractor a ni Sally Santos.
Segun ti DOJ, P181 million iti insubli ni Alcantara, P80 million ken ni Opulencia, P20 million ken ni Santos ken P35 million ken ni Bernardo.
Ti nasao a gatad ket naiturn-overen iti Bureau of the Treasury.
Gapu ta maibilang nga state witness ken makitintinnulong iti panangpapigsa kadagiti kaso dagiti uppay ket kinuna ni Justice Secretary Fredderick Vida nga awan ti criminal liability-da ngem inlawlawagna a saanda a naabswelto iti kaso gapu laeng ta nagisublida iti kuarta.
