Umabot iti P24.4 billion ti gatad ti innapoy ti masaysayang iti Pilipinas kada tawen gapu iti mabatbati nga innapoy a maibalballeng kas pinasingkedan ti Philippine Rice Research Institute.
Iti listaan nga inruar ti Department of Agriculture (DA), mapatta-patta a dua a kutsara iti innapoy kada aldaw iti masaysayang iti tunggal Pilipino.
No mapagtitipon ket katukad dayta iti nasurok-kumurang 10.85 million a sako iti bagas kada tawen.
Segun ti DA, umdas koman ti nasao a kaadu tapno mapakan iti mapatta-patta a 5.17 million a Pilipino iti uneg iti makatawen.
Gapu dayta, papigsaen ti DA ken PhilRice ti Be RICEponsible campaign a mangallukoy iti publiko a mangala laeng iti innapoy a kabaelan nga ibusen, suportaran ti lokal a bagas ken pilien iti nasustansya a rice products.
Inallukoy pay ti DA dagiti aggatang a gatangen ti locally produced rice pakairamanan ti PhilGAP-certified products, kasta payen ti brown, pigmented, low-glycemic index ken high-zinc rice.
