Insingasing ni Batangas Rep. Leandro Legarda Leviste a kissayan ti galay a P250 billion a pondo para ti flood control projects inton 2026 ken iyakar iti saan a nababbaba iti P200 billion para ti edukasyon ken panagkissay ti budget deficit.
Impaganetget ti kongresista a nasaysayaat nga unaen ti panangpapigsa ti edukasyon ken panagbaba ti fiscal deficit iti 3% sakbay a matratar ti panagbaba ti buwis.
Nababalaw manen ti flood control projects kalpasan ti nakaru a tudo gapu ti Bagyo Carina ken habagat iti baet ti nasurok 5,500 a proyekto nga impanakkel ni President Ferdinand Marcos Jr. idi napan a tawen.
Iti naisayangkat nga state of the nation address ti presidente, naipakaammo ti mapapati a korapsyon ken madi a panagaramat ti pondo ken nabilin ti DPWH nga agipasa ti listaan dagiti proyekto para jti nainget nga imbestigasyon.
