Kwinestyonaran ti consumer group a Bantay Bigas ti pannakaipatungpal ti pilot run ti programa a P20 per kilo ti bagas idiay Visayas, ket patienda a pangpabanglo man laengen daytoy iti imahe ni Presidente Ferdinand Marcos Kr kagiddan ti umadani nga eleksion.
Segun ken ni Bantay Bigas spokesperson Cathy Estavillo, double digit ti panagbaba ti trust rating ti presidente ken mabalinna a pabangloen ti naganna para iti senatorial slate na tapno masigurado ti botosda.
Marugian kadagiti napili a lugar idiay Visayas inton umay a lawas ti panagilako iti nalaka a bagas, ken sungbatan ti gobierno ti diperensya iti presyo babaen iti P3.5 agingga P4.5 billion subsidy.
Numan pay bigbigen ti Federation of Free Farmers ti gagem ti programa, kinunada a mabalin a malugi ti gobierno isu a nasaysayaat no ilatang laengen ti dakkel a pondo iti panangpabuslon ti apit dagiti mannalon.
Napili ti Visayas gapu iti nangato a demand ken adda umdas nga stock ti bagas iti rehion.
