Idurduron ti Kamara ti House Bill 10648 wenno PAMANA Act a mangted iti P1,000 kada bulan wenno P12,000 KADA tawen nga ayuda kadagiti nasurok lima milion a minimum wage earner iti pagilian.
Gagem ti addang a matulongan dagiti mangmangged nga adda trabahona ngem marigatan latta kadagiti magastos kas ti taraon, plete, koriente, agas, ken dadduma pay a kasapulan.
Ti ayuda ket maited laeng kadagiti minimum wage earner iti pagilian a rehistrado iti Philippine Identification System ken saan a karaman dagiti benepisyaryo ti 4Ps.
Mabalin pay nga i-apply dagiti sumagmamano a self-employed ken informal workers a nababbaba ti pastrek iti minimum wage.
Saan a cash ti maawat a tulong no di ket dumalan iti digital wallet tapno mabantayan ti panagaramat iti pondo.
Mabalin laeng nga aramaten daytoy kadagiti accredited a local business kas ti sari-sari store, tiendaan, karinderia, groceria, ken botika tapno makatulong kadagiti babassit a negosiante ken lokal nga ekonomia.
