Natakaw ti P1-M a kuarta ken P200-K a gatad ti alahas manipud iti maysa a pagtaengan idiay Molave Street, Barangay Sagat, Sta. Cruz, Ilocos Sur.
Dagiti biktima ket dagiti agassawa nga agtawen iti limapulo ket lima ken agtawen iti limapulo ket uppat, agpada nga agnaed iti nasao a lugar idinto a saan pay nabigbig dagiti suspek.
Iti pannaki-uman ti Bombo Radyo Vigan ken ni PMAJ. Paul Vinsent Tadeo iti Sta. Cruz Police Station, alas otso iti rabii ti June 21, 2026, manarimaan ti panangrabii ti pamilia kadua dagiti gayyem ken kabagyanda iti likudan ti pagtaenganda para iti selebrasionda iti Father’s Day.
Alas dies iti rabii, mapan agdigos ti asawa a babai ket idi sumrek iti kuartoda, nadlawna a mapukpukaw ti baulda isu a pinakaamoanna met dagiti miembro ti pamiliana ker sinapsapulda ngem saanda a nasapulan, isu a nagpatulongda kadagiti pannakabagi ti linteg.
Malaksid iti nasao a gatad ken alahas, natakaw pay dagiti titulo ti daga ken passbook a nakaikabil met laeng iti baul.
Sakbay ti pannakaduktalda a mapukpukaw ti baul, naka-lock ti kuarto ket inaramat ti biktima ti tulbekna tapno makastrek, awan ti pagilasinan a napuersa daytoy a nalukatan.
Naduktalanda pay a ti duplicate key ti kuarto a naibitin iti ruangan ti sari-sari store-da ket mapukpukaw.
Saan met nga ik-ikkaten dagiti pannakabagi ti linteg ti posibilidad iti “inside job” iti napasamak a panagtakawan ken addan kitkitaenda a person of interest.
