Nangidiaya ni suspended Abra Governor Joy Bernos iti maysa milion a pisos a gungona iti asino man a makaited iti impormasyon tapno masapulan ti nangpaltog iti mangisursuro ken dentista iti maysa a panganan idiay Zone 6, Bangued, Abra.
Dagiti biktima ket da Dr. Francisco Beleno Beria a maysa a dentista ken Odilon Peru Peria, teacher by profession iti Abra High School ken agnaed idiay Zone 3 iti nasao nga ili.
Maipalagip a nakatugaw ni Peria iti asideg iti bakod iti panganan kaduana ni Charlon Guliban Blaquera, agtawen iti tallopulo ket walo, mangisursuro met laeng iti Abra High School nga agnaed idiay Zone 6, Bangued, Abra idinto a ni Dr. Beria ket agmaymaysa a nakatugaw iti kabatogda a lamisaan.
Apaman a dimteng ti suspek a nakahelmet ket inasitganna ni Peria nga isun ti nangpaltoganna iti namin-uppat a daras ken nakatamaan ti ulo ni Beria.
Insigida a naglibas ti suspek kalpasan ti pammaltog ket naisayangkat met ti hot pursuit operation.
