Duapulo ket pito a baka nga aggatad iti P1,200,000 ti nasalamaan iti national highway ti Barangay Lacong, Tagudin, Ilocos Sur.
Dagiti kontrabando ket nailugan iti Isuzu Wing Van Truck a minaneho ni Rommel Asuncion Vizconde, agtawen iti tallopulo ket uppat, agnaed iti Barangay Santo Rosario, Aliaga, Nueva Ecija.
Iti pannaki-uman ti Bombo Radyo Vigan ken ni Police Major Kleyvan Dalang, naggapu idiay Meycauayan, Bulacan ti trak a nangilugan kadagiti baka ket ginandat dagiti naglabsing nga iserrek iti probinsia ngem idi makadanonda iti Animal Quarantine Checkpoint ket saanda a nagpainspeksyon.
Napara dagiti pannakabagi ti linteg ti trak idiay Barangay Lacong ngem awan ti naiparang ti drayber a dokumento dagiti baka idi saludsoden dagiti pannakabagi ti linteg, a daytoy ket maibilang a panaglabsing iti Provincial Ordinance.
Ti drayber ken ti lugan agraman dagiti baka ket nakakustodian iti Personnel ti Tagudin Animal Quarantine para iti proper disposition.
