VIGAN CITY – Maipaayan iti tallopulo ket uppat nga oxygen tanks iti amin a barangay a sakupen ti ili ti Bantay.
Segun ken ni Sangguniang Kabataan (SK) Federated President of Bantay Hon. Brando Tabuno, kalpasan ti taripnong ti SK Federation of Bantay ken Inter-Agency Task Force-Bantay ket inkeddengda nga aggatang iti oxygen tanks para iti pagkasapulan dagiti pasyente kagiddan ti kumarkaru a sitwasyon ti covid-19 pandemic.
Ti addang ket tapno adda iti aramaten iti tunggal barangay nga oxygen tanks para iti emergency a pakaaramatan dagiti agindeg.
Nagatang manipod Dagupan dagiti oxygen tanks isu a saan pay a kumpleto a naisangpet ditoy probinsia ta addaan laeng ti sangapulo ket walo iti naiwaras idinto a ti nababati a bilang ket mayur-uray iti pannakaisangpetna.
Kabayatanna, ti pondo a naaramat ket manipod iti nailatang a pondo para koma iti aktibidad iti sports ti SK Federated ta a tawen.
