VIGAN CITY – Kitkitaen a naimbag ti Overseas Worker Welfare Administration (OWWA) Region 1 nu anya ti tulong a maited da iti pamilya ni Maricar Valdez, ti domestic helper idiay Cyprus a mapapati a nasarakan iti bangkay na a naiseksek iti maleta a naibelleng idiay Red Lake, Mitsero, Cyprus a makatawenen a mapukpukaw sipud nagpakada a mapan iti pagtaengan ti gayyem na.
Segun ken ni Virna Agbayani, family welfare officer ti OWWA- Region 1, nu aktibo iti membership ni Maricar, adda iti maawat iti pamilya na a dua gasut ket dua pulo ribo a pisos nu mapaneknekan a napapatay isuna ken ti bangkay na iti nasarakan idiay Cyprus.
Malaksid iti dayta ket adda pay iti livelihood assistance nga aggatad iti sangapulo ket lima ribo a pisos a maited iti surviving spouse ti biktima ken ti inunaan nga anak na ket tulungan ti ahensya nga agbasa agingga a makaturpos iti kolehiyo.
Kabayatanna, nu met saanen nga aktibo ti membership ti OWWA ti biktima, adda laeng iti dua pulo ribo a pisos a maawat a tulong ti pamilya na.
